MBA နှင့် ကျွန်မ .............

ခုတလောမှာ MBA ဆိုတာ လူတိုင်းပါးစပ်ဖျားမှာ တော်တော်လေးရေပန်းစားနေတဲ့ ဘွဲ့တစ်ခုပဲရှင်. ။ 

တစ်ချို့ကလဲ ကိုယ်လုပ်နေရတဲ့ နယ်ပယ်ဝန်းကျင်ဒေသကြောင့်လေ့လာချင်သူတွေရှိတယ်။ 
တစ်ချို့က MBA ရဲ့အနှစ်သာရကိုသိလို့ လေ့လာချင်ကြသူတွေရှိတယ်။
တစ်ချို့ကြပြန်တော့ MBA ဆိုတာ ဘာလဲလို့ ကျယ်ကျယ်ပြန့်ပြန့်မသိသေးဘဲ MBA ရထားရင်တော့ ခေတ်မှီတာပဲလို့ထင်ပြီး လေ့လာချင်ကြတဲ့သူတွေရှိပြန်ပါတယ်။
ဒါဆို MBA တတ်ဖို့ အစီအစဉ်ရှိနေကြပြီဆို ဘာကြောင့်တတ်ချင်တာလဲ ။။ တတ်လိုက်ပြီးရင်ရော ဘာတွေဖြစ်လာနိုင်မလဲ။ ကိုယ်ဘာတွေလုပ်လာနိုင်မလဲ။ ကိုယ့်ရဲ့ MBA ဘွဲ့မရခင် လက်ရှိအလုပ်အကိုင် စီမံခန့်ခွဲမှုအခြေအနေက ဘယ်အတိုင်းအတာထိ ထိရောက်နေလဲ စွမ်းဆောင်နိုင်နေလဲ ။
ဥပမာပြောရရင် MBA ဘွဲ့ရပြီး တစ်နှစ်အတွင်း ကိုယ်ဘာတွေစွမ်းဆောင်လာနိုင်မလဲဆိုတာ အရင်သုံးသပ်ကြည့်စေချင်ပါတယ်။ မြန်မာလူမျိုးတွေက အတုယူလွယ်တယ် .. တစ်ခါတစ်လေမှာ ကိုယ်တိုင်သုံးသပ်တတ်ဖို့ မေ့နေတတ်ကြတယ်။။
MBA တတ်ပြီးလို့ တစ်ချို့သူတွေ အောင်မြင်နေတယ် အဆင်ပြေနေတယ် လစာတွေအများကြီးရနေတယ် မြင်တွေ့ကြရင် ( ဟာ ငါလဲ MBA တတ်ချင်လိုက်တာဆိုတာမျိုး ဖြစ်သွားတတ်ကြတယ်။ ) ရှင့်။။။။။

ဒီနေရာမှာ .. တစ်ချို့မိတ်ဆွေတွေ သုံးသပ်နိုင်ဖို့ သုန်သုန့်ရဲ့ အတွေ့အကြုံလေး ရှယ်ပါရစေ။
အတိုချုန်းရရင် စင်္ကာပူရောက်ပြီး ၁နှစ်နေတော့ ကိုယ့်ရဲ့construction နယ်ပယ်နဲ့သက်ဆိုင်တဲ့ Diploma တစ်ခုယူဖြစ်ခဲ့တယ်။
ပြီးတဲ့နောက် 2015 လောက်ကစ MBA ရူးခဲ့တော့တာပါပဲ။ ဘာလို့ MBA အရမ်းတတ်ချင်သွားသလဲ ၀န်ခံရရင် သုန်သုန်က Management ပိုင်းကို အတော်လေး သဘောကျတယ် ၀ါသနာပါတယ်။ Research ပိုင်းမှာ ပိုပြီးစိတ်ဝင်စားမှုရှိမှန်းကိုယ့်ဘာသာသိထားခဲ့တယ်။ ဒါပေမဲ့ ကိုယ်ရခဲ့တဲ့ဘွဲ့ရယ် လက်ရှိလုပ်နေတဲ့ အလုပ်အကိုင်က ဆောက်လုပ်ရေးနယ်ပယ်ဆိုတာကို ခနမေ့သွားခဲ့တယ်။

MBA နဲ့ပတ်သက်ပြီး ကိုယ်ဘယ်ကျောင်းမှာတတ်သင့်လဲ ကိုယ့်ဝင်ငွေနဲ့ဘယ်မှာအဆင်ပြေနိုင်မလဲ ဘယ်နိုင်ငံကဘွဲ့ကို ယူချင်တာလဲ ဘာတွေလိုအပ်လဲ .. အဲ့ဒါတွေ အကုန်လေ့လာခဲ့တယ် ။ အွန်လိုင်းကနေရှာဖတ်တယ်။ စင်္ကာပူမှာ MBA နဲ့ပတ်သက်သမျှ Seminar တွေ သွားနားထောင်တယ်။ UK နဲ့ Partnership ယူထားတဲ့ SG ကတစ်ချို့ကျောင်းတွေကို သွားလေ့လာတယ်။ သိချငိတာတွေ ဖုန်းဆက်မေးတယ်။ UK ရဲ့ Government website တွေထဲဝင်ပြီး ကိုယ်စိတ်ဝင်စားတဲ့ တက္ကသိုလ်တွေရဲ့ Ranking တွေလေ့လာတယ် ။ အဲ့လိုနဲ့ တစ်နှစ်လောက်ကြာမယ်ထင်တယ်။ ငွေလဲစုရင်း သိချင်တာတွေလဲ လေ့လာရင်း။ 2016 နှစ်ကုန်မှာ MBA တတ်ကိုတတ်ဖို့ဆုံးဖြတ်လိုက်တယ်။ ကိုယ်တတ်ချင်တဲ့တက္ကသိုလ်ရယ်Intake တွေရယ် အကုန်ရွေးပြီးခဲ့ပြီ။ အဲ့ဒီချိန်ထိ သုန်သုန့်စိတ်ထဲမှာ ဖြစ်နေခဲ့တဲ့ အရာတစ်ခုက MBA ဘွဲ့ရပြီးရင် ဆိုတဲ့ အတွေးတစ်ခုထက်မပိုခဲ့ပါဘူး။ MBA ဘွဲ့ရပြီးတာနဲ့ ဥုံဖွဆိုပြီး သူများတွေလို ချက်ချင်း စီးပွားရေးပိုင်းမှာ နေရာတစ်ခုတော့ရနိုင်မယ်လို့ပဲထင်ထားတယ် တွေးထားခဲ့တယ်။ အစီအစဉ်တွေအားလုံးဟာ MBA တတ်ဖို့ပဲဖြစ်နေခဲ့ပြီး အဲ့ဒီ MBA ဘွဲ့ရပြီးရင်ဆိုတဲ့နောက် အစီအစဉ်တွေ ကျော်မကြည့်မိခဲ့သေးဘူး။

တစ်ရက်တော့ ကိုဝင်းသိန်းဦး ဘာသာပြန်တဲ့ MBA မှာသင်ခဲ့ရသမျှဆိုတဲ့ စာအုပ်တစ်အုပ်ကို တွေ့ခဲ့တယ်။ အမှန်အတိုင်းပြောရရင် သုန်သုန်က စာဖတ်မြန်ပါတယ် ။ ဒါပေမဲ့ အဲ့ဒီစာအုပ်အခုထိ တစ်အုပ်လုံးဖတ်လို့မပြီးသေးပါဘူး ။ ဖတ်ရင်း စဉ်းစားစရာတွေအတော်များပါတယ်။ ဖတ်လိုက်လို့ပြီးသွားပေမဲ့ ကိုယ့်ခေါင်းထဲ တစ်လုံးမှနားမလည်လိုက်တဲ့ အကြောင်းအရာတွေကျန်မှာဆိုးတယ်။ ခုချိန်ထိဖတ်နေတုန်းပါပဲ။
အဲ့ဒီစာအုပ်ကို MBA မှာသင်ခဲ့ရသမျှဟု နာမည်ပေးထားပေမယ့် စင်စစ်အားဖြင့်MBA ပရိုဂရမ်မှာ သင်ကြားခဲ့ရတာတွေအပြင် မူလစာရေးသူကိုယ်တိုင် လေ့လာစူးစမ်းရှာဖွေ ဖော်ထုတ်တီထွင်ထားတဲ့ စီးပွားရေးစီမံခန့်ခွဲမှုဆိုင်ရာ နည်းလမ်းကောင်းတွေကိုပါ အပိုထပ်ဆောင်းထည့်သွင်းရေးသားဖော်ပြထားသောကြောင့် MBA ဘွဲ့ရများရော ၊ ဘွဲ့မရသေးသူများပါ စီမံခန့်ခွဲမှုနဲ့ မကင်းနိုင်တဲ့ မည်သူမဆို လေ့လာဖတ်ရှုပြီး ၊ မိမိတို့ရဲ့ လုပ်ငန်းခွင်မှာ လက်တွေ့ကျကျ အကျိုးရှိစွာ အသုံးချနိုင်မှာ ဖြစ်ပါတယ်။
စာအုပ်ရဲ့မူလစာရေးသူဟာ စီမံခန့်ခွဲမှုဆိုင်ရာ ပညာရပ်တွေကို လေ့လာမှုမပြုဘဲ စီးပွားရေးလောကထဲကို ဝင်ရောက်ပြီး ခုနှစ်နှစ်ကြာ လက်တွေ့လုပ်ကိုင်ခဲ့သူဖြစ်ပါတယ်။
ဒါ့ကြောင့် သူဟာ စီးပွားရေးစီမံခန့်ခွဲမှုနယ်ပယ်မှာ လက်တွေ့ရော စာတွေ့ပါ ပြည့်စုံလုံလောက်စွာ လေ့လာဆည်းပူးခဲ့သမျှ ပညာရပ်တွေကို ပြန်လည်မျှဝေတဲ့အနေနဲ့ စီးပွားရေးစီမံခန့်ခွဲမှုဆိုင်ရာအတိုင်ပင်ခံ အကြံပေးပုဂ္ဂိ်ုလ် အဖြစ် လုပ်ကိုင်ဆောင်ရွက်ရင်း မန်နေဂျာများအတွက် အကျိုးကျေးဇူးဖြစ်ထွန်းစေမယ့် စာအုပ်စာတမ်းတွေကို ရေးသားပြုစုလျက်ရှိပါတယ်။
နောက်တစ်ခုက သုန်သုန် Blog တွေဖတ်လေ့ရှိတော့ အခြေခံစီးပွားရေးအကြောင်းဆိုတဲ့ Blog တစ်ခုကိုထပ်တွေ့ခဲ့တယ်။ အဲ့ဒီ Blog မှာ စီးပွားရေးနဲ့ပတ်သတ်သမျှအခြေခံကစပြီး သဘောတရားတွေရှင်းပြရေးပြထားတယ်။ ကိုယ်ပိုင်တစ်ဦးတည်းအမြင်နဲ့ပြောရရင်တော့ အဲ့ဒီ Blog ဟာ လူတစ်ယောက်စီးပွားရေးလောကထဲကိုဝင်ဖို့ MBA တတ်စရာမလိုဘူးဆိုတဲ့သဘောမျိုးတွေကို ပိုချပြတယ်လို့ထင်တယ်။

အဲ့လိုနဲ့ 2016 နှစ်ဝက်လောက်မှာ စာရွက်တစ်ရွက်ပေါ်မှာ ဖြစ်ချင်တာတွေကိုခနဖယ်ပြီး ဖြစ်သင့်တယ်ထင်တဲ့အခြေအနေအကြောင်းအရာတွေကို ချရေးကြည့်တယ် ။ သုံးသပ်ကြည့်တယ်။ ထပ်ခါထပ်ခါ ကိုယ့်ဘာသာ ပြန်မေးကြည့်တယ်။

ဘာကြောင့် MBA ကို ကျမ တတ်ချင်တာလဲ။
ကျမ MBA တတ်သင့်သလား ။
MBA တတ်ပြီးရင် ကျမ ဘာတွေလုပ်နိုင်မလဲ။
ကိုယ်ပိုင် စီးပွားရေးလုပ်ချင်လို့ MBA တတ်မှာလား ။
ပညာရပ်တစ်ခုကိုလေ့လာတဲ့အခါ အရာရာပြီးပြည်စုံစွာသိဖို့လိုအပ်တာလား ။ အတွေ့အကြုံအယူအဆတွေက ပိုအရေးကြီးသလား။
MBA တတ်နေတုန်းမှာ လက်ရှိ ကျမအလုပ်ကို ဘာတွေအဆင့်မြင့်အောင် ထောက်ပံ့ပေးနိုင်မလဲ။
MBA ဘွဲ့ရပြီးသွားရင်ရော ကိုယ်ပိုင်စီးပွားရေးမလုပ်ဖြစ်သေးရင် သူများအလုပ်မှာဆက်လုပ်မယ်ဆို ကိုယ်ဘယ်နယ်ပယ်မှာ အဓိက အားသာချက်ရှိသလဲ။
MBA ဘွဲ့နဲ့ ကိုယ့်ဘာသာ Confident အပြည့်အ၀ Management လုပ်နိုင်မလား။
စီးပွားရေးလုပ်ငန်းရှင်ဖြစ်ချင်တာလား ။။ စီးပွားရေးဆိုင်ရာ အတိုင်ပင်ခံအကြံပေးသူဖြစ်ချင်တာလား။
MBA ဘွဲ့ရပြီးတာနဲ့ မြန်မာပြည်ပြန်မှာလား စင်္ကာပူမှာပဲ အလုပ်ဆက်လုပ်နေဦးမလား။ စတဲ့ မေးခွန်းတွေ တော်တော်များခဲ့ပါတယ်။
ဒါပေမဲ့ ကျမ အဖြေရခဲ့တယ်။ ကိုယ်ဘာဖြစ်ချင်တာလဲ ဘာလုပ်သင့်တာလဲ ရှင်းရှင်းလင်းလင်းသိခဲ့ရတယ်။

သုန်သုန့် အဖြေတွေနဲ့အတွေးတွေက MBA တတ်ဖို့စိတ်အားထက်သန်နေမှုကို ၈၀ ရာခိုင်နှုန်းလောက် ပျောက်သွားခဲ့တော့တယ်။
အပေါ်မှာပြောခဲ့သလိုပဲ သုန်သုန် MBA တတ်ပြီးရင် စီးပွားရေးနယ်ပယ်မှာနေရာတစ်ခုတော့ရမယ်လို့ထင်ခဲ့တယ်။ မှန်ပါတယ်။ နေရာတစ်ခုဆိုတာ ကိုယ်ကြိုးစားသလောက်အရာထင်နိုင်ပေမဲ့ အချိန်အတိုင်းအတာတစ်ခုလိုပါတယ်။
MBA တတ်မဲ့ကာလ ၂နှစ်ရယ် .. ပြီးသွားရင် အဲ့ဒီ နယ်ပယ်မှာ စာတွေ့ထက်လက်တွေ့ပိုင်းတွေ ကျွှမ်းကျင်ဖို့ပေးရမဲ့အချိန်ရယ်ဆို ၄နှစ်ထားပါတော့။
သုန်သုန် ၄ နှစ်အချိန်ပေးရမယ် တွက်ခဲ့တယ်။ အသက် ၃၀ နားနီးမှ နယ်ပယ်အသစ်တစ်ခု စလေ့လာတဲ့အတွက် စီးပွားရေးလောကမှာ သူများထက်ပိုပင်ပန်းမယ် ။ ပိုရင်းနှီးရမယ် ။ လက်ရှိအလုပ်ကိုပဲ
ဆက်ရင်းနှီးရင်နောက်ထပ် ၄ နှစ်မှာ ဖြစ်လာနိုင်မဲ့ အခြေအနေကိုစဥ်းစားမိတယ်။

နောက်တစ်ချက် စီးပွားရေးအမြင်နဲ့ပဲသုံးသပ်ကြည့်ရအောင် ။
MBA ကျောင်းလခ မြန်မာငွေ သိန်း ၂၀၀ ကျော် ။ ကိုယ်တိုင်ရှာလို့ရတဲ့ငွေနဲ့ စုတတ်ရတဲ့ ကျောင်းဖြစ်တဲ့အတွက် အဲ့ဒီကိစ္စကိုပိုစဉ်းစားပါတယ်။
ငွေ သိန်း ၂၀၀ ဟာ စီးပွားရေးတစ်ခုစလုပ်ဖို့ အရင်းအနှီးရနိုင်တဲ့ငွေ ရကောင်းရနိုင်တယ်လေ။
နောက်ပြီး MBA အတွက် သိန်း ၂၀၀ ရင်းလို့ ကျောင်းပြီးသွားရင် အဲ့ဒီ သိန်း ၂၀၀ ကို MBA ဘွဲ့အလုပ်အကိုင်နဲ့ ကိုယ်ဘယ်လောက်ပြန်ရှာနိုင်မလဲတွေးကြည့်တယ်။
ဥပမာ MBA ဘွဲ့ရလို့ သူများအလုပ်မှာပဲ အလုပ်လုပ်မယ်ဆိုပါဆို့ .
လက်ရှိအလုပ်မှာ တစ်လ၀င်ငွေ သိန်း ၃၀ ရနေပြီး MBA ဘွဲ့ရပြီးလို့ သိန်း ၃၀ ပဲရနေဦးမယ်ဆို MBA အတွက် ရင်းနှီးထားတဲ့ ငွေ သိန်း ၂၀၀ ဟာ တစ်နှစ်အတွင်းပြန်ရဖို့ မလွယ်ကူပါဘူး။ ဘာလို့ သုန်ဒီလိုတွေးလဲဆို လက်ရှိ ကိုယ်လုပ်နေတဲ့ ဆောက်လုပ်ရေးအင်ဂျီနီယာနယ်ပယ်ကနေ စီးပွားရေးနယ်ပယ်ကိုပြောင်းပြီး အလုပ်ရဖို့ဆိုတာ သိပ်တော့မလွယ်ကူလှဘူးလို့ သုန်ထင်မိတယ်။ အချိန်တွေ နောက်ထပ်ပညာတွေ ထပ်ရင်းရမယ်။ နောက်ထပ်ဘာတွေးမိလိုက်လဲဆိုတော့ သုန် လက်ရှိနယ်ပယ်ကိုပဲ အဆင့်မြင့်လိုက်တာဟာ ပိုပြီးလဲ အတွေ့အကြုံတွေရမယ် ။ သိန်း ၂၀၀ ရင်းကျောင်းတတ်ရတာချင်းအတူတူ Master ဘွဲ့ချငိးအတူတူ ရင်းထားတဲ့ငွေကို ၁နှစ်အတွင်းပြန်ရှာဖို့ ဖြစ်ကိုဖြစ်နိုင်တယ်။ ဘာလို့လဲဆိုတော့ လက်ရှိလုပ်ကိုင်နေတဲ့ နယ်ပယ်မှာ အတွေ့အကြုံရော Confident ရော မိမိဘာသာ ယုံကြည်ချက်ရှိလို့ပါပဲ။

နောက်တစ်ချက် ။
စီးပွားရေးလုပ်ချင်လို့ MBA တတ်လို့ရလာမဲ့ ပညာတွေ အတွေ့အကြုံတွေ ခေါင်းဆောင်မှုပညာတွေ စီမံခန့်ခွဲမှုတွေကိုရချင်လို့ MBA တတ်ချင်ပါတယ် ဆိုတဲ့ အရင်ကအဖြေ။
စီးပွားရေးလုပ်ဖို့ MBA တတ်မှဖြစ်မယ်ဆိုတာ မလိုအပ်ပါဘူး။
အမေရိကန်မှာ ကိုကာအရွက်နဲ့ကိုလာအရွက်တွေရေဖျော် စတင်ရောင်းခဲ့ရပြီး အောင်မြင်လာတဲ့ Coca Cola အချိုရည်ဆိုတာတွေ အသက် ၆၀ကျော်လောက်မှစပြီးကြက်ကြော်လေးရောင်းပြီး အသက် ၈၀လောက်မှအောင်မြင်လာတဲ့ KFC ကြက်ကြော်တွေ ,
မူလီတွေတောင်ထုတ်ရောင်း အမျိုးမျိုးသောပျက်စီးဆုံးရှုံးမှုတွေကြုံပြီးမှဖြစ်လာတဲ့ ဂျပန်နိုင်ငံက ဟွန်ဒါဆိုတာတွေ စတာတွေဟာ MBA မတတ်ဘဲ အောင်မြင်လာခဲ့တဲ့သူတွေပါပဲ။
စီးပွားရေးလုပ်ချင်လို့ MBA တတ်မယ်ဆိုတဲ့ သုန်သုန့်အတွေးဟာ မိဘစီးပွားရေးကိုပဲ ပြန်ဦးစီးမယ်ဆိုတောင် ကိုယ့်မှာရှိနေတဲ့ အကြံညဏ်တွေ အတွေးအမြင်သစ်တွေဟာ MBA မတတ်သေးဘဲလဲ ရနိုင်တယ်ဆိုတာ သိသွားတယ်။

နောက်ပြီး ၂၀၃၀ ဆိုတဲ့အခြေအနေတစ်ခုကို ကြိုသုံးသပ်ကြည့်မိတဲ့အခါ .. နိုင်ငံတကာဟာ နယ်ပယ်အသီးသီးမှာ ယခုထက်ပိုပြီး ဖွံ့ဖြိုးတိုးတတ်လာနေကြမှာပါပဲ။
IT ကဏ္ဏရယ် Management အပိုင်းရယ်ဟာ လူတိုင်းသိသင့်သိထိုက်တဲ့ အခြေအနေတစ်ခုဖြစ်လာမယ်။ အဲ့ဒီတော့ ကိုယ်လက်ရှိအတွေ့အကြုံများနေတဲ့ နယ်ပယ်ကိုပဲ နည်းပညာပိုင်းတွေ ထပ်အဆင့်မြင့်တာဟာ ကိုယ့်အတွက်ပိုပြီးအထောက်အကူပြိုနိုင်တယ်လို့သုံးသပ်မိတယ်။

ခုရေတွင်းတူး ခုရေကြည်သောက်လို့မရဘူးဆိုတဲ့ အခြေအနေကို နားလည်ပါတယ် ။
ဒါပေမဲ့ ခုလို MBA တတ်သင့်မတတ်သင့် ဘာလို့သုံးသပ်ရလဲဆိုရင် အဓိကအကြောင်းရင်းက ရခဲ့တဲ့ ဘွဲ့ရယ် လက်ရှိလုပ်နေတဲ့နယ်ပယ်ရယ် အရေးကြီးဆုံးဖြစ်တဲ့ Self Confident ရယ်ဆိုတဲ့ အဖြေရခဲ့လို့ပါပဲ။
နောက်ပြီး MBA တတ်ပြီးလို့ ဘွဲ့ရပြီးရင်လဲ မြန်မာပြည်ပြန်ဖို့ အခြေအနေ မသေချာသေးလို့ဆိုလဲမမှားပါဘူး။
အသက် ၂၁ နှစ်အထိ မိဘဆီက လက်ဖြန့်တောင်းပြီးလေ့လာခဲ့ရတာတွေ လုံလောက်သလို နောက်ထပ်ကိုယ်လိုချင် သိချင်တဲ့ အတတ်ပညာတွေအတွက် မိဘဆီက လက်ဖြန့်တောင်းလေ့လာဖို့ အခြေအနေမဖြစ်ချင်လို့လဲဖြစ်ပါတယ်။
မှန်တာပြောရရင် ကိုယ်ပိုင်ဝင်ငွေတစ်ခု ရင်းပြီး လေ့လာရမှာဖြစ်တာမို့ ပိုစဉ်းစားမိတာဖြစ်ပါတယ်။

ဒါကြောင့် ကိုယ့်ဖြစ်ခဲ့တဲ့ ခံစားခဲ့ရတဲ့ အတွေ့အကြုံကိုပဲ ရှယ်တာဖြစ်လို့ MBA တတ်ခြင်းရဲ့ ကောင်းသည် ဆိုးသည် ဆိုတာ ကိုယ်ပိုင်ခံယူချက် ကိုယ်ပိုင်သုံးသပ်ချက် ကိုယ်ပိုင်ယုံကြည်ချက်နဲ့ပဲ သက်ဆိုင်ပါတယ်
ခုနောက်ပိုင်းမှာ သူငယ်ချင်းတွေက မေးကြတယ် ( သူ MBA တတ်ချင်တယ် အဆင်ပြေလောက်လား) ဆိုရင် မေးတဲ့သူရဲ့ အခြေအနေကိုကြည့်ပြီး ဖြစ်ကောင်းဖြစ်လာနိုင်တာတွေကိုပဲ သုန်သုန် သုံးသပ်ပြပါတယ်။
ဘယ်တော့မှ တတ်ဖို့မတိုက်တွန်းသလို မတတ်ဖို့လဲ မတားဆီးပါဘူး။ ဘာလို့လဲ ဆိုတော့ သုန်သုန်ကိုယ်တိုင်လဲ MBA ကိုခုချိန်ထိ စိတ်ဝင်စားနေတုန်းပါပဲ။ အလျဉ်းသင့်သလို အွန်လိုင်းကနေ Free learning လုပ်တုန်းပါပဲ။

ဒါကြောင့် စင်္ကာပူမှာပဲဖြစ်ဖြစ် မြန်မာပြည်မှာပဲဖြစ်ဖြစ် MBA တတ်ချင်ကြတယ်. ဘယ်လိုနေရာမှာ ဘယ်နိုင်ငံတကာတက္ကသိုလ်တွေကနေ ဘယ်လောက်အချိန်ပေးပြီးလေ့လာနိုင်လဲဆိုတာတွေ သိသလောက် ကူညီမျှဝေပေးပါတယ်။
အလုပ်လုပ်ရင်း ကျောင်းတတ်လို့ရမဲ့ အဆင်ပြေနိုင်တဲ့ ကျောင်းတွေ . ကိုယ် MBA ဘွဲ့ယူချင်တဲ့ အခြားနိုင်ငံက တက္ကသိုလ်ရဲ့ ranking တွေ ကျောင်းလခတွေ GMATနဲ့ပတ်သတ်တာတွေ သိသလောက်အကူအညီလိုရင် ပြောပြပေးနိုင်ပါတယ် ။
ဘာလို့လဲဆိုတော့ ဒါသင် ဒါကျက် ဒါဖြေ ဆိုတဲ့ စနစ်တစ်ခုကနေကြီးလာရတဲ့ ကိုယ်တွေလိုလူတွေအတွက် တခြားနိုင်ငံတကာက ဘွဲ့တွေ လေ့လာလိုချင်တဲ့အခါ ကြုံတွေ့ရင်ဆိုင်ရတဲ့အခြေအနေ အခက်အခဲတွေကို ကိုယ်ချင်းစာမိလို့ပါ။

ခုနောက်ဆုံးမှာတော့ .
MBA တတ်ချင်တဲ့ဆန္ဒတစ်ခုကို ခနဥပေက္ခာပြုပြီး ကိုယ်တကယ်တတ်သင့်တယ်ထင်တဲ့ကျောင်းကိုပဲ ရွေးချယ်ခဲ့ပါတော့တယ်။ Management ပိုင်းကို ၀ါသနာပါတဲ့ ကျမအတွက် စီမံခန့်ခွဲမှုနဲ့ဆိုင်တဲ့ specializationကိုပဲ ရွေးချယ်ထားပါတယ်။
အဆင်ပြေပြေနဲ့ Offer ရခဲ့မယ်ဆိုလျှင် အဲ့ဒီနိုင်ငံက ကိုယ့်နယ်ပယ်နဲ့ကိုက်ညီတဲ့ ကျောင်းတွေဘယ်လိုလျှောက်၇တယ်။ ဘာတွေလေ့လာရမယ် ဘာတွေလိုအပ်တယ်ဆိုတဲ့အတွေ့အကြှုံရှယ်ချင်ပါသေးတယ်။

ဒီအကြောင်းအရာဟာ ဘယ်တစ်ဦးတစ်ယောက်ကိုမှ ထိခိုက်ခြင်း အလျဥ်းမရှိသလို MBA တတ်သင့် မတတ်သင့်ဆိုတာ ဝေဖန်သုံးသပ်ပြတဲ့အရေးအသားလဲမဟုတ်ရပါ။
ကိုယ်ပိုင်အတွေးအမြင်တစ်ခုအဖြစ်သာပါပဲ.။

MBA ရဲ့အသီးအပွင့်ကို ရနေတဲ့သူတွေကိုလဲ လေးစားမိသလို မရသေးလို့ ကြိုးစားနေတဲ့သူတွေကိုလဲ အားကျမိပါတယ်။
ဒါကြောင့် MBA တတ်ဖို့ တွေးနေပြီဆို အပေါ်မှာပြောထားတဲ့ ကိုဝင်းသိန်းဦးဘာသာပြန်စာအုပ်ကိုဖတ်စေချင်ပါတယ်။
တတ်ဖို့ဆုံးဖြတ်ထားတယ်ဆိုရင်လဲ မြန်မာပြည်မှာဆို ကျမသဘောကျမိသလောက် ကျောင်းတွေထဲက Business Institute of Yangon (BIY) တို့ MIC (Myanmar Imperial College) တို့မှာ တခြားနိုင်ငံတကာက MBA ဘွဲ့တွေကိုလေ့လာဖို့ စုံစမ်းနိုင်ပါတယ်။
အောက်မှာ အလွယ်တကူလေ့လာဖို့ LInk တွေ ထည့်ပေးထားပါတယ်။

https://www.facebook.com/Business-Institute-Yangon-BIY-717210428318492/?fref=ts <<<< BIY

https://www.facebook.com/myanmarimperialcollege/?fref=ts <<<< MIY

အခုဆိုရင် MBA ဘွဲ့ကို Yangon Institute of Economics မှာလဲ လေ့လာသင်ယူလို့ရနေပြီမို့ အရမ်းဝမ်းသာမိပါတယ်။

http://www.myanmaronlinemba.com/WebAccess/Programmes.aspx << ဒီလင့်မှာ ပြည့်ပြည့်စုံစုံလေ့လာနိုင်ပါတယ်။

စင်္ကာပူမှာဆိုရင်တော့ ရွေးချယ်စရာများသလို ကိုယ် ဘယ်နိုင်ငံက MBA ဘွဲ့ကိုလိုချင်သလဲ ဘယ် Ranking ရှိတဲ့ University မှာ တတ်ချင်သလဲဆိုတာတွေ ဆုံးဖြတ်ပြီး စုံစမ်းနိုင်ပါတယ် ။ Free seminar တွေတတ်နိုင်ပါတယ်။
ကိုယ်တတ်ချင်တဲ့နိုင်ငံနဲ့တက္ကသိုလ်တွေရဲ့ Ranking ဟာ အရေးကြီးတာမို့ သူတို့နိုင်ငံရဲ့တရားဝင်အစိုးရwebsite တွေကနေ Ranking တွေကို စစ်ဖို့ အကြံပေးပါရစေ။ ဥပမာ UK နိုင်ငံက ဘွဲ့တစ်ခုလိုချင်ပြီဆိုပါစို့။
Partnership ယူထားတဲ့ local ကျောင်းတွေရဲ့စကားတင်နားမထောင်ပဲ ကိုယ်တိုင် UK အစိုးရ website တွေမှာhttps://www.gov.uk/check-a-university-is-officially-recognised/overview .......
http://www.studyin-uk.com/uk-study-info/university-rankings/ စတာတွေမှာ ကိုယ်တိုင်လေ့လာ သိရှိနိုင်ပါတယ်။

သုန်သုန်
03/09/2016